من اكتر المواضيع المهمه اللي بتحتاج توعيه للأب والأم وبعمل كده لكل أسره بتيجي العياده فا نعمل توعيه عامه بالموضوع احسن 😊
طفل من كل ٥ اطفال في سن الخمس سنوات عنده تبول ليلي لا ارادي والموضوع بيبقي بنسبه اكبر لو واحد من الوالدين كان عنده تبول ليلي ومهم الطفل يعرف المعلومتين دول عشان الثقه في النفس جزء مهم من العلاج وخصوصا لو عرف ان حد من والديه كان عنده نفس المشكله وراحت لما كبر
٣ أسباب بيعملوا كده؛ ضعف في التنبيه اثناء النوم ،قلل في هرمون بيفرز بالليل بيقلل كميه البول، انقباضات عصبيه للمثانه ممكن واحده بس وممكن التلاته مع بعض
في اسباب عضويه ممكن تسبب الموضوع زي التهابات المثانه ،الاملاح العاليه بالبول او مشاكل الاعصاب .. والاسباب دى بنعرف نستثنيها بسهوله مع الفحص ونسبتها قليله
نيجي للمهم .. الموضوع بيتحسن لوحده بنسبه ١٥٪ كل سنه يعني السن معانا مش علينا ..فمنقلقش احنا بنعالج عشان الموضوع ميأثرش نفسيا علي الطفل
مينفعش ابدا بأي شكل نحسس الطفل ان اللي بيحصل ده غلط أو نعاقبه ده بيخلي الموضوع أسوأ ..لازم نقوي ثقته بنفسه ونعمل العكس ؛ نكافأه لو التزم بالتعليمات ومهم يكون الطفل هو اللي بيعمل جدول يتابع فيه كل يوم عمل ايه ويبقي فاهم دايما إنه كبير ومسؤول و هو اللي هيبطل من نفسه
ممنوع البيبسي والشيبسي والاملاح والشطه والشاي والنسكافيه كلها حاجات يا إما بتزود إدرار البول يا اما بتعمل تهيج للمثانه
شرب الماء كويس اوي طول اليوم.. لكن ممنوع الشرب قبل النوم بساعتين عشان نتحكم في الكميه اللي الجسم بيفرزها اثناء النوم
دخول الحمام قبل النوم مباشرة وبعد النوم بساعتين ومهم جدا نصحي الطفل كويس لأن نومه بيبقي تقيل وبيكون مش حاسس نظبط المنبه ونصحيه ونكلمه وبعدين نسيبه ينام تاني
التعليمات مع الثقه بالنفس نص العلاج والادويه بتساعد الحالات اللي التعليمات لوحدها مش كفايه فيها والنظام ده بنستمر عليه كام شهر لحد ما نعوّد الطفل والعلاج بنوقفه بالتدريج
وفي الاخر الموضوع مش مقلق وبسيط ومش بنعمل اي حاجه قبل سن ٥سنين لان لسه اصلا بيكون الجهاز العصبي للطفل بيتطور
متعاقبوش ولادكم .. إدوهم ثقة في نفسهم وهما هيبهروكم
